യുവ നടിയെ സംവിധായകൻ കമൽ ബലാത്സംഗം ചെയ്തതായി പരാതി

സംസ്ഥാന ചലച്ചിത്ര അക്കാദമി ചെയർമാനും സംവിധായകനുമായ കമലിനെതിരെ ബലാത്സംഗ ആരോപണവുമായി മോഡലായ യുവനടി. കമൽ സംവിധാനം നിർവഹിച്ച’പ്രണയമീനുകളുടെ കടൽ’ എന്ന ചലച്ചിത്രത്തിൽ നായികാവേഷം വാഗ്ദാനം ചെയ്ത് ഔദ്യോഗിക വസതിയിൽ വെച്ച് മാനഭംഗപ്പെടുത്തിയെന്നാണ് കൊച്ചിയിലെ അഭിഭാഷകൻ മുഖേനയയച്ച നോട്ടീസിലെ ആരോപണം. ചലച്ചിത്രത്തിൽ അവസരം വാഗ്ദാനം ചെയ്ത് പീഡിപ്പിച്ച ശേഷം വിശ്വാസവഞ്ചന കാട്ടിയതായും നോട്ടീസിൽ കുറ്റപ്പെടുത്തുന്നു.

ഇടപ്പള്ളിയിലെ സ്കൈലൈൻ അപ്പാർട്ട്മെന്റിൽ വെച്ച് 2018 ഡിസംബർ 26 നാണ് കമലിൻ്റെ ആവശ്യപ്രകാരം യുവനടി ആദ്യമായി അദ്ദേഹത്തെ കാണുന്നത്. പിന്നീട് നടിയോട് ഫോട്ടോഗ്രാഫുകൾ വാട്സാപ്പ് വഴി അയച്ചു കൊടുക്കാൻ നിർദ്ദേശിച്ചു. തുടർന്ന് സ്ഥിരം സന്ദേശങ്ങൾ അയയ്ക്കുകയും 2019 ജനുവരി ഒന്നിന് തിരുവനന്തപുരം പിടിപി നഗറിലെ എസ്എഫ്എസ് സിറ്റിസ്കേപ്സ് എന്ന അപാർട്ട്മെൻ്റിലേക്ക് സിനിമയിലെ വേഷത്തെക്കുറിച്ചുള്ള വിശദ ചർച്ചയ്ക്കെന്ന വ്യാജേന വിളിച്ചു വരുത്തി ലൈംഗികമായി പീഡിപ്പിക്കുകയായിരുന്നു. ഇംഗിതത്തിന് വഴങ്ങിയില്ലെങ്കിൽ വാഗ്ദാനം ചെയ്ത നായികാ വേഷത്തിൽ നിന്നും മാറ്റുമെന്നായിരുന്നു കമലിൻ്റെ ഭീഷണി. തുടർന്നും ലൈംഗിക തൃഷ്ണ അറിയിച്ച് കമൽ സന്ദേശങ്ങളയച്ചെങ്കിലും യുവനടി വഴങ്ങിയില്ല.

എന്നാൽ ജനുവരി 25ന് ചിത്രീകരണം ആരംഭിച്ചപ്പോൾ വാട്സാപ്പ് സന്ദേശങ്ങൾ നിർത്തി. തനിക്ക് വാഗ്ദാനം ചെയ്യപ്പെട്ട നായികാ പദവിയിൽ കൂടിക്കാഴ്ച്ചയ്ക്ക് മുമ്പ് തന്നെ മറ്റൊരാളെ നിശ്ചയിച്ചിരുന്നതായി ചിത്രീകരണം പൂർത്തിയായ ശേഷമാണ് യുവനടി അറിഞ്ഞത്. പിന്നീടുള്ള അന്വേഷണത്തിൽ കമൽ, ആട്ടിൻതോലണിഞ്ഞ ചെന്നായയാണെന്ന് മനസ്സിലായതായി വക്കീൽ നോട്ടീസിൽ പറയുന്നു. ‘ആമി’ എന്ന സിനിമയുടെ ചിത്രീകരണവുമായി ബന്ധപ്പെട്ട് കമൽ രണ്ട് യുവനടികളെ ലൈംഗികമായി ചൂഷണം ചെയ്തിരുന്നെന്നും സ്വാധീനമുപയോഗിച്ച് അവരുടെ പരാതികൾ ഒതുക്കുകയായിരുന്നുവെന്നും അന്വേഷണത്തിൽ കണ്ടെത്തിയതായും നോട്ടീസിൽ പരാമർശിച്ചിട്ടുണ്ട്.

അവസരം തേടിയെത്തുന്ന യുവനടികളെ സ്ഥിരമായി ലൈംഗികചൂഷണം ചെയ്യുന്നയാളാണ് കമലെന്ന് തൻ്റെ വാദിക്ക് ബോധ്യപ്പെട്ടതായും അഭിഭാഷകൻ 2019 ഏപ്രിൽ 26ന് അയച്ച നോട്ടീസിൽ ചൂണ്ടിക്കാട്ടുന്നു. ബലാത്സംഗവും വിശ്വാസവഞ്ചനയും നടത്തിയ കമൽ നോട്ടീസ് കൈപ്പറ്റി ഒരാഴ്ചയ്ക്കുള്ളിൽ മാപ്പ് പറയണമെന്നും പെൺകുട്ടിക്കേറ്റ മാനഹാനിക്ക് നഷ്ടപരിഹാരം നൽകുന്നതിനെക്കുറിച്ച് ആലോചിക്കേണ്ടിയിരിക്കുന്നുവെന്നും അല്ലാത്തപക്ഷം നിയമനടപടികളിലേക്ക് നീങ്ങുമെന്നും മുന്നറിയിപ്പ് നൽകിയിട്ടുണ്ട്. മലയാള സിനിമയിലെ കാസ്റ്റിംഗ് കൗച്ചിനെക്കുറിച്ച് ഇതിനകം ഉയർന്ന ആരോപണങ്ങൾ ശരിവെക്കുന്നതാണ് കമലിനെതിരെയുള്ള വക്കീൽ നോട്ടീസിലെ ഉള്ളടക്കം.

കമലിനെതിരെ കൂടുതൽ വെളിപ്പെടുത്തലുമായി ‘ഈ പുഴയും കടന്ന് ‘ എന്ന സിനിമയുടെ നിർമ്മതാവ് കണ്ണൻ രംഗത്തെത്തി. ഇദ്ദേഹത്തിനെതിരെ പരാതി ഉയരാൻ ഏറെ വൈകിയെന്നും അദ്ദേഹം ഒരു ആട്ടിൻതോലണിഞ്ഞ ചെന്നായ തന്നെയെന്നും കണ്ണൻ ഒരു സ്വകാര്യ ടെലിവിഷനോട് പ്രതികരിച്ചു.
നടപടി സ്വീകരിക്കാൻ നിയമപാലകരാണ് തയ്യാറാകേണ്ടതെന്ന് നടൻ ശ്രീനിവാസനും പ്രതികരിച്ചു. എന്നാൽ ഇത് പഴയ കേസാണന്നും ഇത് ഒതുക്കി തീർത്തതാണന്നും ആരോപണങ്ങളോട് കമൽ പ്രതികരിച്ചതായി ഈ വാർത്ത പുറത്തു കൊണ്ട് വന്ന ജനം ടിവി റിപ്പോർട്ട് ചെയ്യുന്നു.

കമൽ ചലച്ചിത്ര അക്കാദമി ചെയർമാൻ സ്ഥാനം രാജിവക്കണമെന്നും അദ്ദേഹത്തിനെതിരെ നടപടിയെടുക്കാൻ സർക്കാർ തയ്യാറാകണമെന്നും പ്രതിഷേധം സംഘടിപ്പിച്ചു കൊണ്ട് യുവമോർച്ച ആവശ്യപ്പെട്ടു. കമലിനെതിരെ വൻ പ്രതിഷേധമാണ് ഉയരുന്നത്.

Comments are closed.